Extract

Sarah: Stranger Danger

Ma da says ee’s gittin a new caur.

N’ah says see r’at man roon n’corner

s’got a funny motor,

s’got lectric windaes,

s’got a compewur in it,

s’got a wee man in it says

Few-elle is low.

N’ma da says whit’ve ah telt you?

N’ah says at’s no sweerin.

N’ma da says mind yer cheek.

Gaun in strange motors?

Whaur’s yer heid?

Whit’ve ah said aboot gaun wi strangers?

N’ah says s’man roon n’air.

N’ma da says aye, n’at’s whit you say!

Whit dae you ken?

Jist you walk hame.

A wee man in it!

Be waantin ye tae go

an see ees puppies next.

N’ah says hus ee got puppies?

N’ma da says Naw, an they never huv.

Onywey, it micht be a rabbit.

but you wullnae see it.

So dinnae you be gaun

in ony mair strange caurs

r’ah’ll gie ye the back ae ma haun.

N’en, whin ah came oot the school

is motor stops, ini man says

m’oan you, ah’ll gie ye a run hame.

N’ah says naw, ye wullnae.

N’ee says, ae ye stupit?

Git in, ah’ve no got aw day.

N’ah says spect ye’ve got a puppy.

N’ee says Sarah, ah’m yer daddy.

N’ah says aye, n’at’s whit you say.

Ee skelpt ma lug!

N’ee says at’s fur yer cheek.

Noo ye kin walk hame.

Spec ee hud a rabbit up ees jook.